من زود الفضاوة ........ قالت أخيتي بوسع صدري وأدور لي شغله أتلهى فيها .
لا وظايف ولا شي .
عاد هي كلش ما تحب الأشغال الفنية بس قالت بطلع لي طلعه مدري وين توديني
بصلح لي عروسه اللي رجلينها طوال ( عصاقيل )
طبعا تم خياطة الرجلين والجسم وبعد ما قلبت القماش ترارارارم
صارت الرجلين فوق وصارت كانها أذان حمارة القايلة .
عاد المووووهم ما استسلمت حشتها قطينات ورفعت رجليها للأعلى وخلتها أذان ولبستها شعر وطلعت مدري أرنب ولا قطو ؟؟؟؟؟
المووهم إنها من ذوي الحيوانات .
عاد هنا يوم صارت بارعه في خياطة عرايس الجوخ عرايس بدون عصاقيل
يكفي تنطط رجلين فوق
هذي مكرونة بنيتي . أول مكرونة تسويها
سمينا وكلناها وما شفنا شر
عقبال ما تصير منال العالم
هذولا قطيوات توهن مولودات من يمكن أسبوعين
طلعت من المدرسة ولقيتهم يلعبون في حديقة المنزل
قلت آخذ لهم صورة
بس للأسف ضاعوا من أمهم وجلست تدور عليهم لين صارت تدور حوالينا وتحن
بس عجزنا نفهمها ما ندري عنهم شي
لكن بعد 3-4 أيام لقت بس الاشقر والثاني مدري وينه هايت فيه
هذي كيكة الجوال .
الله يسلمكم أنا عندي جوال N80 بس الكل أزعجني غيريه
له معي 5 سنوات في الخدمة وصابر
بس في آخر شي أزعجني كل شوي يقفل
قلت بشتري لي واحد جديد وتحدوني المعلمات
قلت لهم بشرط تحطون له كيكه
قالوا إيه
يوم اشتريته قالوا أنتي حطي له
بس وحدة من المعلمات الله يجزاها خير مادريت إلا وهي جايبتنها من بكرا
قلت عاد لازم ناخذ له صورة تذكارية
قصيت الكيكة وسدحت الجوال في ركن منها .طبعا الجوال الجديد.
تراه خلصت لا تتوقعون بعزمكم .
هذي عاد ودي أقولكم ولو إني مستحيه
بس شسوي أخاف تتعبون من التفكير في الموضوع وتحسبون فيها جوائز وترسلون الحلول
هذي الله يكرمكم حفاظتي وأنا صغيره 
مع إني عند نفسي ما زلت صغيرة في دروب الحياة .
