هذي الصينية من اختراعاتي الحلوة بعد ماصار معي كم أكشن إني ألفها زي السمبوسة وتقطعت القرصان . حاولت إني الفها طوليه أصابع ، بعد تقطعت المسكينة ما تحملت .
المهم مافيه أنا برمضان والمغرب بيأذن ولازين إفطار شهي وأنا ما سويت شي حاطة في بالي سمبوسة قرصان بر.
إليكم الطريقة والمفاجأة :
الحشوة : بصل أخصر كامل بجذورة وأوراقة مقطع حسب رغبتك
دجاج مفروم
فلفل بارد ملون ربع من كل لون أو نص من لونين اذا ماعندك الألوان الأربعة
ملح وبهارات ( م/ص فلفل ، م / ك كركم ، شبت وإكليل الجبل ) أو أي أعشاب مجففة عندك
جبن برايد القليل الدسم
جبن بارميزان
صلصة المكرونة الجاهزة أو صلحيها بالبيت
قرصان بر مقطعة باليد تنتيف
_______________________________________
حمري الدجاج في المقلى بدون أي إضافات . شيلية من الصينية بعدين حطي الفلفل البارد مع شوي زيت زيتون لين يطلع ريحه حلوة بس لا يذبل أضيفي له نص كمية البهارات والأعشاب المجففة .
بعدين خذية وأضيفيه على الدجاج وجيبي البصل وحمرية دقيقتن بشوي زيت زيتون وأضيفي باقي البهارات ثم أعيدي الخليط السابق على البصل وقلبيه على النار مع بعض دقيقة فقط لا يلين .
حطي طبقة قرصان بعدين جبن برايد ابشرية بعدين الخليط ورشي شوية بارميزان ثم الصلصة ثم الطبقة الثانية من القرصان وأعيدي الترتيب والثالثة قرصان وصلصة بس . أو طبقيها على مزاجك .
خليها بالفرن تقريبا 20-30 دقيقة نار هادئة وغطية بقصدير .
